2024/2025
Schistage Eben im Pongau 2025
Vum 16. bis den 21. Mäerz ware 70 Schüler mat 8 Begleetpersoune fir e Schistage zu Eben im Pongau am Jugendgästehaus Lindenhof.
No iwwer 10 Stonne mam Bus goufe mir vun der Famill, déi de Lindenhof bedreift, immens häerzlechempfaangen. Vum Iesse bis bei d’Kummere war alles tipp topp ënnerhalen an et huet een sech direkt wuel bei hinne gefillt.
Den Dag drop ass et du richteg lass gaangen an d’Schüler goufe vun Ufänger bis Experten a 7 Gruppen agedeelt. De Monte Popolo, d’Schigebitt zu Eben im Pongau, gëtt vun de lokale Leit als „Heimberg“ bezeechent.
Mat 6 km Pist ass et effektiv en immens kléngt Schigebitt, mee duerch dee bësse Neischnéi hate mir gutt Konditiounen, virun allem fir eis Ufänger.
Och eis Experte ware fir déi éischt Deeg gutt um Monte Popolo bedéngt. Si konnten op der rouder Pist a bei der Talabfahrt weise wat se drop hunn an et huet definitiv keen sech musse schummen.
Den 3. Dag waren dunn déi méi erfuere Schifuerer op Flachau, en anert Schigebitt wat a 15 Minutte mam Bus ze erreechen ass. Dëst Schigebitt ass bëssen eng aner Dimensioun an huet 210 km Pist.
De 4. Dag war jidderee prett fir op Flachau a mir haten en immens flotten Dag mat zimmlech gudde Konditiounen. Just Mëttes gouf et relativ waarm an de Schnéi war, wéi eenzel Schüler gesot hunn, éischter mat Granita ze vergläichen. Trotzdeem war et immens flott a mir hunn eis all gutt ameséiert a vun der Sonn profitéiert.
D’Schüler, déi nom Schifueren nach fit waren, konnten sech Owes an enger immens flotter Sportshal austoben. Anerer hu léiwer Kicker oder Dëschtennis gespillt, oder se hunn op hire jeeweilege Stäck fir bëssen Onrou gesuergt. Den 3. Owend konnten d’Schüler bei engem Quiz Owend hiert Wëssen ënner Beweis stellen. De leschten Owend duerften d’Schüler e bësse méi laang opbleiwen. Déi eng hu ganz gespaant e Fussballmatch gekuckt an déi aner konnten um Disco Owend beim Sangen an Danzen alles ginn.
Et war eng immens flott Woch déi deelweis mat wéineg Schlof verbonne war, mee dofir awer mat ëmsou méi flotten Erënnerungen.
Holzgau 2025
Vum 2. bis den 7. Juni waren 42 2e an 3e Schüler mat 6 Begleetpersounen zu Holzgau.
An enger wonnerschéiner Landschaft ëmginn vun Bierger an dem Floss Lech hunn si eng Réih sportlech Aktivitéiten ugebueden kritt, an et war wuel fir jiddereen eppes dobäi. Mir sinn wanderen gaangen, E-Mountainbike gefuer, hunn Yoga mat Panorama Bléck gemaach, waren um Lech rafting fueren, an och am Boot Camp konnten d’Schüler weisen wéi fit a motivéiert si waren. Mir waren och vill klammen fir d’éischt an de Kloterpark, dunn op enger natierlecher Fielswand, an déi mat ganz vill Courage, hunn d’Via Ferrata gemaach.
Moies haten d’Schüler och deelweis méi gemittlech Atelieren. Si hunn geléiert Guitar spillen, wärend dem Foto Atelier goufen immens flott Fotoen geholl, an si duerften an der Kichen mathëllefen. Eenzel Schüler haten sech och ugemellt fir déi lokal Brennerei Lechtaler Haussegen kucken ze goen, wann een al genuch war krut een hei och eppes ze schmaachen. Dee véierten Dag hunn mir Nomëttes en Dagesausfluch op Schwangau gemaach. Hei hate mir eis opgedeelt; ee Grupp huet de Wellness an d’Thermalbäder genoss an déi aner waren d’Schlass Neuschwanstein besichtegen. Owes war och all Méigleches um Programm, mee hei waren d’Highlights ganz kloer d’Gaudi Hütt an d’Lagerfeier, wou bis zum Schluss gedanzt a gesonge ginn ass.
No dëser Woch voller Sport war et am Bus fir Heem och zimmlech roueg an deen een oder anere war och ganz frou, dass mir Méindes e Feierdag haten fir ze raschten.
Professeurs
Christian MARCHE
Daniel KARELS
Tom COURTEHOUTE
Yves LINSTER